SESORAH LAN TULADHA SESORAH

A.    PANGERTOSAN SESORAH

Pidhato inggihpunika omongan/ucapan kang ditata kanthi apik lan disampekaken marang wong liya. Pidhato minangka salah sawijine ketrampilan lisan kanggo ngungkapake isine pikiran, perasaan, gagasan, warta lan liya-liyane.

B.    RANTAMANING SESORAH/CENGKORONG/ KERANGKA

1. Salam pambuka (manut kapitadosan saha swasananipun)
2. Purwaka inggih punika ngunjukaken puja puji marang ngarsanipun Gusti saha atur panuwun marang para rawuh sarta ingkang mbiyantu lampahing adicara
3. Surasaning basa/Isi pidhato kang gambarake maksud, gambaran, sasaran, lan liya-liyane
4. Penutup kang gambarake dudutan, pangarep-arep inggih menika intisarining wedharan pangajeng-ajeng inggih menika bab bab kang dipunkajengaken dening ingkang nindakaken sesorah dhumateng ingkang mireng
5. Salam penutup utawa Wasana inggih punika atur panuwun saha atur nyuwun pangaksami anggenipun nindakaken jejibahan.

C.     JINISING SESORAH

1.    Pidhato pembukaan, yaiku pidhato ringkes kang disampekake pembawa acara utama MC.

2.    Pidhato pengarahan, yaiku pidhato kanggo ngarahake sawijine kagiyatan.

3.    Pidhato sambutan, yaiku pidhato kang disampekake ing sawijine adicara tartamtu, kanthi wektu kangm ung sadhela, amarga sing menehi sambutan ora mung wong siji.

4.    Pidhato peresmian, yaiku pidhato kang dilakokake dining wong kang dueni pangaribowo kanggo ngresmekake samu barang.

5.    Pidhato laporan, yaiku pidhato kang isine ngelaporake sawijining tugas utowo kegiatan.

6.    Pidhato pertanggung jawaban, yaiku pidhato kang isine sawijine laporan pertanggung jawaban tugas utama/kagiyatan

D.    METODE-METODE SESORAH

1.       Sesorah kanthi model Apalan

Caranipun inggih menika saderengipun sampun damel serata sesorah lajeng dipunapalaken tembungipun ngantos ukaranipun persis kaliyan cathetan. Cara menika asring dipunginakaken dening lare-lare ingkang nembe gladhen utawi ajar.

2.       Sesorah kanthi model Naskah utawi Teks

Inggih punika juru pamedhar sabda saestu bekta naskah, teks utawi cathetan pidato lajeng dipun waos sawetahipun, boten dipunapalaken. Cara menika asring dipunginaken dening para pejabat utawi punggawaning negeri.

3.       Sesorah kanthi model Dadakan utawi Impromtu

Cara menika boten kanyana-nyana saderengipun menawi badhe dipunaturi sesorah, utawi ndadak ing adicara menika lajeng dipunaturi sesorah. Sangunipun cara sesorah menika kedah trampil ing pamicara saha kathah pengalaman saha seserepanipun.

4.       Sesorah kanthi model Eksemporan

Sesorah menika kanthi cara juru pamedhar sabda ngasta utawi damel cathetan alit minangka gaman utawi pangemut-emut urutaning ingkang badhe dipun ngendikakaken. Cathetan wau namung wos-wos utawi garis ageng ingkang badhe dipun aturaken.

E.     TULADHA TEKS SESORAH

tema ; Dinten Sumpah Pemuda

SUMPAH PEMUDA

 Assalamualaikum Wr. Wb.

 Bapak Kepala Sekolah ingkang satuhu kula bekteni, Bapak/Ibu Dwija saha karyawan SMA Negeri 11 Sembada ingkang satuhu kinurmatan, sarta kanca-kanca ingkang kula tresnani. Ingkang sepisan sumangga kula panjenengan sedaya ngaturaken puji syukur dhateng Gusti Allah ingkang maha welas asih ingkang tansah paring nikmat saha rahmat satemah kula saha panjenengan taksih saged pados ngelmu inggih menika taksih saged sinau wonten ing pawiyatan kita menika.

Kaping kalih, nuwun sewu kula sampun kumawantun jumeneng wonten ngarsa panjenengan sedaya saperlu badhe ngaturaken sesorah bab Sumpah Pemuda. Kula panjenengan sedaya tamtu sampun sami mangertos bilih tanggal 28 Oktober bangsa Indonesia mengeti dinten Sumpah Pemuda. Inggih menika salah satunggaling kedadosan sakral ingkang nedahaken dhateng sedaya tiyang bilih bangsa Indonesia bangsa ingkang anggadhahi semangat juang, semangat nyawiji bhineka tunggal ika, dados bangsa ingkang jumeneng kanthi jejeg.

Wondene wosipun Sumpah Pemuda inggih menika:

1. Kami Putra dan Putri Indonesia mengaku bertanah air satu, tanah air Indonesia
2. Kami Putra dan Putri Indonesia mengaku berbangsa satu, bangsa Indonesia
3. Kami Putra dan Putri Indonesia mengaku berbahasa satu, bahasa Indonesia

Wosipun sumpah saha prasetya menika wajib kula saha panjenengan sedaya jagi saha dipunwarisaken dhumateng putra wayah kagem mujudaken gegayuhan kamardikan saha gesang kanthi gemah ripah loh jinawi tata tentrem kerta raharja, adil saha sejahtera. Kita minangka siswa nggadahi jejibahan njagi semangat dalah mempeng anggenipun sinau. Minangka pemuda kita ugi kedah semangat saha sregep anggenipun nyambut damel ngisi pambangunanipun bangsa.

Menika ingkang saged kula aturaken ngengingi babagan Sumpah Pemuda. Pramila cekap semanten kemawon atur kula, mbok bilih kathah klenta-klentuning atur kula tansah nyuwun agunging pangaksami.

Wassalammuallaikum Wr. Wb.

kapethik saking : http://kampoengilmu.com/sesorah-bahasa-jawa/sumpah-pemuda/